للطيب درب وللرخامه متاهات

يالله يالـي فـوق سبـع السمـاوات
تفرج لحال اللي عصته الليالـي

سايرتها بسكـات بسكـات بسكـات
واقول بكره يصلـح الله حالـي

ماودي اشكي عنـد عـاذل وشمـات
ولابي علي الناس تلقى مجالـي

اقضي طـوال الليـل نـوح ٍوونـات
والناس ماتدري عن الي جرالي

صبـرت واستبدلـت قولـي تنهـات
وتسابقن دمعات عينـي توالـي

عليـك ياحلـم ٍاشوفـه ولا مــات
رغم الحضوض النادرات القلالي

لك الذي مـا تختلـف فيـه هقـوات
ماتختلف هقوة رفيـق ٍعنالـي

لا والله اثبت والحق القـول باثبـات
والقول ما يثبت عزوم الرجالـي

لا والله الى الفعـل والفعـل بالـذات
محد ٍيقول المر يانـاس حالـي

للطيـب درب وللرخامـه متـاهـات
ويالي بغيت الطيب اسمع مقالي

صـل الصـلاة واد كـل العـبـادات
واسجد لوجه الله عزيز الجلالي

وللوالدين حقـوق ذكـرت بالايـات
ياجب عليك اصغاااء ثم امتثالي

ثم عقبهـا لاتلحـق النـاس نمـات
اوزن كلامك يرفعك فوق عالـي

ترى لسان الشخص للشخص مرئـاة
ان اعتدل عدلت وان ملت مالي

واحرص على وقتك ترى الوقت لافات
تندم على فوتـه ليـال ٍطوالـي

لاصـار مـا شيـد شبابـك بنايـات
لاصرت شايب ما بنيت العوالي

شيدلك من الطيب قصـر وعمـارات
تذكربها لاصرت تحت الرمالـي

اسمع كلام الناس وانضـر للامـوات
واختر لنفسك ما تريـده يقالـي

واحذر ترى للنفس رغبه وشهـوات
ان طعتها راحت عليك المعالـي

طرد الهـوى ذلـه ولافيـه شكـات
ياما تنزل مـن (سبايبَه)عالـي

ولا تلحقك من قلـة الحـال ضيقـات
خلك على ماقال( صدرك شمالي)

اضربهـا واحـذر تطيـح بمغبـات
ولا تنفتن نفسك بطرد الريالـي

واعرف ترى غال الكنوز القناعـات
من فاز فيها فاز والفوز غالـي

ولا تخـوَف مـن نهايـة بـدايـات
خلك على كل الامـور ارتجالـي

الخوف يرمـي صاحبـه فالهزيـلات
ويثنيه عن كسب الامور الجزالي

الموت مره لاكـن ان خفـت مـرات
والله ما تمشي حياتـك عدالـي

خالط جميع النـاس كـون علاقـات
لا تجلس لحالك تصير انعزالـي

لاكن بنفس الوقت ياصـاح هيهـات
تمشي بهواك الناس في كل حالي

فالناس طيب واكثـر النـاس عيَـات
رافق هل الطولات خل الثعالـي

والجـار كثـر جيتـه والـزيـارات
سيَر ترى الدنيى سريعة زوالي

فنجال بن وعـود ٍ ازرق وضحكـات
تشيل هم الـي همومـه ثقالـي

مافـات فـات وماهـو اتــي ٍ آت
اسمع كلامي وافهمـه للتوالـي

رتـب حـيـاتـك حـط الـك اولـويــــات
وخطوط حمرى واضحات ٍ جلالي

الدين لا ترضى على الديـن خمـلات
هاك الكلام الي يهـز الجبالـي

والله ما ترضى عليـك الولايـااااات
الين تتبع درب ذيـك الملالـي

جاهد عـدو الله فـي كـل الاوقـات
بالحال ولا المـال ولا العيالـي

ثـم الوطـن احيـان تاتيـه حـزات
تبي رجال(ن)يحملون الحمالـي

وقـف بعـزة نفـس قلـه سلامـات
يالمعتدي فالعقل جاك اختلالي؟؟

ثم اقطع الرجعه وقـل جيـت مـوات
والله ما تفرح بيـوم احتلالـي

هاذي لأهل الطيـب مثـل العلامـات
نضمت فيها كل كـار ٍ طرالـي

وللطيـب درب وللرخامـه متاهـات
ويالي بغيت الطيب طبق مقالـي


سبحان الله و بحمده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

Scroll to Top