سو اللي براسك ولا تذكر أسبـــاب *** لا صرت بايعني توكل على اللــــه
مابيني وبينك مشاريه وعتـــــــــاب *** شف دربك اللي جيت منه تدلــــــــه
ماراح تغلبني لو الحب غــــــــلاب *** من حضرتك عشان قلبي تذلــــــــــه
في ذمتي لجعلك عبرة للأحبـــــــأب *** لين الخليل يتوب عن جرح خــــله
زلاتك اللي مانفع فيهن حســـــــاب *** لاجيت اعددهن على القلب عـــلــه
أحرجتني بين القرايـب و الأصحاب*** كن الجفا سيف بوجهي تسلــــــــــه
ماكنت اقصر فيك من كثر الإعجاب*** يومك يساوي عندي الكون كلـــــــه
كنت القريب وكلهم كانوا أغــــراب *** حتى القمر لاغاب شفتك محلــــــــــه
خلاص لا ترجع ترى خاطري طاب*** الخاطر اللي كنت عايش بضـــــــله
روح وأعتبرني واحد اذنب وتــــاب*** ماني بثوب تلبسه ثم تملـــــــــــــــــه
مايحتمع بالحب صادق وكـــــــذاب ***رزقي على الله وانت رزقك على الله